Beriya mitînga Serokkomar Recep Tayyîp Erdogan ya Wanê, tevahiya kolan û cade ji aliyê polîsan ve hatine dorpêçkirin. Ji bîlboardan afîşên partiyên din hatin rakirin û wêneyên Erdogan lê hatin daliqandin.
Serokkomar û namzetê Serokkomariyê yê Tifaqa Cumhur Recep Tayyîp Erdogan îro li Wanê dê mitîngekê lidar bixe. Beriya Erdogan bê Wanê tevahiya bajêr ji aliyê polîsan ve hat dorpêçkirin. Polîs û maşîneyên zirxî li hemû kolan û cadeyên bajêr hatine bicihkirin. Ji duh êvarê ve afîşên partiyên siyasî yên li ser bîlboardan hatin rakirin û li şûna wan wêneyên Erdogan û afîşên AKP’ê lê hatin bicihkirin. Her wiha li ser rêgeha konvoya Erdogan, al û flamayên partiyên din hatin rakirin û alên AKP’ê hatin dliqandin.
Rêxistina AKP’ê ya Wanê li gelek dibistan û saziyên dewletê jî posterên Erdogan daliqand in. Ji bo mitînga Erdogan qelebalix derbas bibe tevahiyê saziyên dewletê seferber bûne û hewl didin bi darê zorê karmandan tev li mitîngê bikin. Ji gundan jî cerdevanan ji serê sibehê ve tînin bajêr û ji gelek bajarên din jî bi dolmûş û otobusan xelkê tînin Wanê.
Makîneyek mezin a X-Ray danîne ber Bazara Gel a Mezin. Dikandar di vê X-Rayê re derbas bûn û çûn ser karên xwe.
Şaredariya Bajarê Mezin a Wanê rêgeha ku dê Erdogan têde derbas bibe şûşt. Her wiha hemû qutiyên çopê yên li bajêr hatin rakirin. (MA)
Serhat News
