Peykertraşê Îranî Alî Mutîî ku li Wanê jiyan dike, bi bermahiyên hesin rûpoş (maske), peykerê heywanan, pêlîstok û berhemên xemlê çêdike.
Peykertraş Alî Mutîî di sala 2007’an de ji welatê xwe koçî Wanê kiriye û ji demê vir jî li vê derê jiyan dike. Mutîî, ev 6 sale di atolyeya xwe ya li Taxa Selîmbeyê hunera xwe berdewam dike.
Mutîî, beriya niha ji bermahiyên hesinê peykera pisîka Wanê ku 650 kîlo giran e, çêkiribû.
Hunermendê ku 3 zarokên wî hene, heta niha nêzî 100 peykerên rûpoş, mirîşk, dîk, mêş/moz, teyr û xezalan çêkiriye.
Ew, bi vî şiklî hem hewl dide debara mala xwe pêk bîne û hem jî dixwaze balê bikişîne ser veguherînê.
Mutîî, diyar dike ku ji bo çêkirina peykeran ew li dikanên temîra erebayan, bermahiyen hesin berhev dike û wiha got: “Ez perçeyên erebayan ji dikanên temîrê yên erebayan berhev dikim û li vir çêdikim. Carinan 3-4 roj an jî hefteyekê bi peykerekî re mijûl dibim. Ji bo temamkirina rûpoşkê min 2 hezar 500 perçe bikar anîn. Bi rastî gelek hewldan dixwaze.”
Serhat News
