Li Wanê şevêdin berfê destpê kir û îro heta serê sibê jî bê navber berdewam kir. Li navenda bajêr stûrahiya berfê gihişt 30 santimetreyan. Dikandaran jî berfa ku ketiye li ber deriyê dikanan bi xwe paqij kirin.
Li Wanê ku ji şevêtin heta serê sibeyê bê navber berf barî, welatiyan di jiyana xwe ya rojane de hin zehmetî kişandin. Hemû rê û kolanên bajêr tuje berf bû û dikandaran jî boneya ku Şeredariya Wanê hin rê ne vekerine û berfa nava bajêr paqij nekiriye, bi xwe berf paqij kirin. Dikandar serê sibê dest avêtin mer û bêran, berfa li ber dikanên xwe paqij kirin.
Esnafê bi navê Yemen Çevirel got ku barîna berfê başe, lê şarediriyê tu xebat nekirine û gazincên xwe wiha anî ziman: “Şaredariyê di vî warî de tiştek nekiriye. Me bi zehmetî karî ji ber berfê dikanên xwe vekirin. Hin dikandaran bi derfetên xwe pêşiya dikanên xwe paqij kirine. Esnaf şerpeze bûne. Ew nikarin têkevin dikanan, gelo bikir wê çewa bên? Şaredarî gelek qelse û di warê xebatê de xemsar e.”
Welatiyê bi navê Vehbî Sumen ku li nava bajêr karê barkêşiyê dike, destnîşan kir ku ew li taxa Terzioglu ya Rêya Armûşê rûdine û ji ber ku rê nehatine vekirin, vê sibê ew bi peyatî hatiye sûkê. Sumen, got ku piştî ji Şaredariya Bajarê Mezin a Wanê re qeyûm hatiye dîyarkirin, şaredariyê tu kar û xebat bo bajêr nekiriye.
Serhat News
(lg)
Video-Montaj: Dildar Guler
