Piştî kuştina jina Kurd Jîna Emînî, li Îranê çalakiyên nerazîbûna bê navber didomin. Hat ragihandin ku di nava 4 rojên dawî de zêdetirê 7 kes di van çalakiyan de hatine qetilkirin û nêzî 450 welatî jî birîndar bûne. Her wiha tê gotin 250 welatiyên Kurd jî ji aliyê hêzên rejîmê ve hatine revandin.
Li gor agahiyên ji Rêxistina Mafên Mirovan a Hengaw ya Îranê hatine wergirtin, ji 19’ê Îlonê vir ve di çalakiyan de herî kêm 3 welatî ji aliyê hêzên rejîma Komara Îslamî ya Îranê ve hatine qetilkirin. Dîsa li gor, rêxistinê, di van çalakiyan de 221 welatî birîndar bûne, zêdetirî 250 Kurd revandin û her wiha nêzî 500 welatî jî hatine desteserkirin.
Her wiha, Hengawê ragihandiye ku, çalakiyên di 19’ê Îlonê de li bajarên Kurdan destpê kiribûn niha li 24 bajarên din belav bûye û 13 bajarên din jî çalakiyên nerazîbûnê hatine destpêkirin.
Bajarên ku çalakî lê tên darxistin evin: Îlam, Abdanan, Malekshahi, Kirmanşah, Ravansar, Javanrud, Paveh, Kamiyaran, Senendej, Dehgolan, Qorveh, Merivan, Seqiz, Baneh, Divandare, Bijar, Piranşar, Serdeşt, Mahabad, Bukan, Tekab, Ûrmiye, Oshnavyeh û Quturê.
Hatiye zanîn ku welatiyê bi navê Mohsen Mohammadî li bajarê Dîvandareyê, Reza Lotfî yê 25 salî li Dehgolanê û Fereydoun Mahmoudî jî di çalakiyên li bajarê Seqizê de hatiye qetilkirin.
Serhat News
Jêder:Bîanet Kurdî
