Piştî qetilkirina jina Kurd a bi navê Jîna Mehsa Amînî ji aliyê rejîma Îranê ve, ev 14 rojin li vî welatî bê navber çalakîyên şermezarkirinê tên lidarxistin. Tevî vê, li ser banga Navenda Hevkariya Partiyên Kurd yên li Îranê, îro li dijî bombebarankirina baregehên partiyan li Herema Kurdistanê greva giştî hat kirin.
Li gor nûçeya Rûdawê, li paytext Tehran a Îranê û her wiha li bajarên wekî Seqiz, Sine, Meşhed, Kerec, Kirman, Tewrêz, Erdebîl, Lahîcan, Dizfûl, Abadan çend cihên din çalakî hatin lidarxistin û rejîma komara îslamî ya Îranê hate şermezarkirin.
Her wiha, li ser banga Navenda Hevkariya Partiyên Kurd yên Îranê, greveke giştî hatiye lidarxistin. Piştî banga grevê, Rêxistina Kurdistanî ya Partiya Komunîst a Îranê, Partiya Azadiya Kurdistanê, Partiya Serbestiya Kurdistanê, Partiya Serxwebûna Kurdistanê yên Îranê û bi dehan rêxistinên din piştevaniya xwe ji vê daxwazê re ragihandine.
Serhat News
