Li Hatayê 2 nexweşxaneyên ku ji ber erdhejê zirar dîtinê hatin valakirin. Nexweşên li van deran dihatin dermankirin jî ji nexweşxaneyên din re hatine veguhestin.
Şevê din saet di 20.04’an de li navçeyên Samandag û Defne yên Hatayê bi pileyên 6.4 û 5.8’an erdhej çêbûn. Li gel bajarên herêmê, her wiha Sûriye, Urdun, Iraq, Filistîn, Îsraîl û Misir jî ji van erdhejan bibandor bûn û hişyariya tsûnamiyê hat dayîn. Piştî erdhejê dema du welatiyan li Taxa Gazî ya Antakyayê hewl didan ji avahiya 4 qat alavên xwe derxînin, di bin kavilan de man. Di encama xebatên lêgerînê de cenazeyên 2 kesan hatin derxistin.
Nexweş bi helikopter û ambulansan hatin veguhestin
Welatiyên di erdhejên navend Mereşê de birîndar bûyîn, li nexweşxaneyên Hatayê dihatin dermankirin. Lê belê ji ber erdhejên duh ên li bajar, di çarçoveya tevdîran de biryara tehliyekirina Nexweşxaneya Dewletê ya Îskenderûnê û Nexweşxaneya Lêkolîn û Sepandinê ya Zanîngeha Mûstafa Kemal hate dayîn. Birîndarên li van nexweşxaneyan bi helîkopter û ambulsan sewqî nexweşxaneya bajar hatin kirin.
Li Osmaniyeyê jî avahiyek çar qatî hilweşiya
Di heman demê ji ber erdhejên navend Hatayê, li kolana hejmar 9056 a Taxa Rahîme Hatûn a Osmaniyeyê avahiyeke 4 qat hilweşiya. Li ser agahiya ku welatiyek di avahiyeke kêmxesar de dimîne, tîmên lêgerîn-rizgarkirinê sewqî herêmê hatin kirin. Xebatên lêgerîn-rizgarkirinê yên li avahî didomin. (MA)
Serhat News
(lg)
