Rêveberê Şîrketa Lêkolînê ya Metropollê Ozer Sencar got ku, eger HDP bo serokkomariyê berbijêr diyar neke, dê hilbijartin di gera yekem de bi dawî bibe.
Li Tirkiyeyê hilbijartinên parlamento û serokkomariyê wê di 14’ê Gulanê de bê lidarxistin. Şirketên anketê jî lêkolînên xwe amade dikin û ji raya giştî re eşkere dikin.
Heta niha Recep Tayyip Erdogan, Kemal Kiliçdaroglu, Muharrem Înce, Sinan Ogan, Fatih Erbakan, Ahmet Ozal û Dogu Perinçek berbijêriya xwe ya bo serokkomariyê ragihandine. HDPê jî heta niha biryar nedaye û tê çaverêkirin di 22’ê Adarê biryara xwe eşkere bike. Tê payîn ku HDP berbijêr nîşan nade û dê piştgiriya Kemal Kiliçdaroglu bike.
Rêveberê Şîrketa Lêkolînê ya Metropollê Ozer Sencar di vê derbarê de got: “Li gor lêkolînan ji bo ku hilbijartin di gera yekem de bi dawî bibe, divê HDP berbijêr nîşan nede û Serokê Partiya Memleket Muharrem Înce jî nebe berbijêr. Dengê Partiya Memleket di meha Çileyê de ji sedî 0,5 bû. Meha Sibatê gihişte %2.7 û di meha Adarê de jî gihişte %3.5an.”
Sencar dibêje, eger berbijêr zêde bin bi îhtîmaleke mezin hilbijartin dê bo gera duyem bimîn e.
Sencar got: “Eger Kemal Kiliçdaroglu û CHP, Muharrem Înce qani bikin dê ev di berjewendiya Hevpeymaniya Millet de be. Eger na hilbijartina ku Sinan Ogan û Muharrem Înce berbijêr bin û HDP jî berbijêr nîşan bide di gera yekem de bi dawî nabe. Eger HDP berbijêr nîşan nede û berbijêriya yên din berdewam be, dîsan jî dibe ku di gera yekem de bi dawî nebe.” (Rûdaw)
Serhat News
(lg)
