Wênesaz Ozgur Tarhan pêşengeha xwe ya bi nave ‘Jin’ li Wanê vekir. Tarhan, derbarê pêşengehê de got ku wê xwestiye tengasî, xembarî û fikarên jinan bi jest û mîmîkan bide nîşandan.
Pêşengeha ku li Akadamiya Çand û Hunerê ya Uvercînîkayê hatiye vekirin, wê heta 25’ê Adarê vekirî bimîne. Wênasaz Ozgur Tarhan, pêşengaha xwe li 8’ê Adarê Roja Jinên Kedkar a Cîhanê îthaf kiriye. Ev pêşengaha Tarhanê ya yekemîn a tekekesiye ku hatiye vekirin û ji wêneyên jinan pêk tê.
Pêşengeh di nava 6 mehan de amade bûye
Tarhan amadekariya pêşengehê di nava 6 mehan de qedandiye û dibêje ku ev pêşengeh berhema keda wê ya bi salan e. Tarhan, diyar dike ku wê xwestiye bi vê pêşengehê hêz, pîrozî, qudret û erka jinê ya di nava civakê de bide nîşandan.
Rewşa jinan dide nîşandan
Ew derheqê pêşengehê de dibêje ku li hemberî zor û zehmetiyên jinan yên di nava civakê de têne jiyandin wê xwestiye, tengasî, xembarî û fikarên jinan bi jest û mîmîkan bide nîşandan.
Herî dawî Tarhan destnîşan kir ku pêşengeh rastî eleqeyeke baş tê û ew jî ji ber vê yekê keyfxweş e.
Tarhan kiye?
Wênesaz Ozgur Tarhan, bi eslê xwe ji Wanêye û ji Beşa Hunerên Bedew ya Fakulteya Perwerdehî ya Zanîngeha Yuzuncuyila Wanê di 2016’an de mezûn bûye. Ew heta niha tevli gelek pêşengehan bûye û hêj jî li Beşa Hunerên Bedew ya Zanîngeha Yuzuncuyilê lîsansa bilid berdewam dike.
(lg)
